日聞夜聞花花遊世界

 蚺 蛇 尖 

由於疫情關係, 2020年, 短短過左三個半月, 小編已經取消左3個Trip....

展望去到年中都好似未有機會飛住, 加上好多康體活動都取消左, 所以星期六日呢d weekend, 

就向山上面發展, 所以近呢幾個月大家都feel到真係多左好多人行山, 

冇旅行去, 就不如改下打行山 Blog, 第一次出行山 blog寫得唔好多多見諒, 呢篇亦都係第一篇用返口語化打既Blog

檢視較大的地圖

返返正題, 香港行山有三尖, 分別係青山, 釣魚翁同埋蚺蛇尖 (Sharp Peak), 而今次介紹既係位於西貢東面, 468米高既蚺蛇尖, 

上網都好易搵到相關既資料, 而登頂既路線都算好多, 分別可以係高流灣、西灣亭、赤徑碼頭等地方做起步點

而我兩次都係行以下既路線:

北潭凹 > 赤徑 > 大浪坳 > 蚺蛇坳 > 蚺蛇尖 > 米粉頂 > 東灣 > 大灣 > 鹹田灣 > 大浪坳 > 赤徑 > 黃石碼頭巴士總站

 合 共 大 概 14 公 里 , 需 時 6-7 個 鐘  

https://my.viewranger.com/route/details/MjkzMTQzNQ== (更多資料, 努力Edit中)

交通

我兩次都係星期日去, 鑽石山巴士總站, 坐星期日及公眾假期限定 既96R出發

平均10-15分鐘一班車, 而因為要坐大半個鐘至一個鐘, 所以建議你去排隊其實係排緊下班車, 去北潭凹站落

而走既時候有人會行返出去 北潭凹 走, 但因為8,9成機會D巴士係會滿人飛站或者冇位坐

所以可選擇返到赤徑就坐艇仔($20蚊一個人) 返黃石碼頭巴士總站上車, 你去到赤徑D大媽自然會係咁問你係唔係返黃石

當然朋友仔有時間同腳力可以由赤徑用多 個半鐘行埋返黃石碼頭

  詳 細 路 線 景 點 打 咭 位   

北 潭 凹 (出發點)> 赤徑 > 大浪坳 > 蚺蛇坳 > 蚺蛇尖 > 米粉頂 > 東灣 > 大灣 > 鹹田灣 > 大浪坳 > 赤徑 > 黃石碼頭巴士總站

o係北潭凹落車, 向前少少行, 去返馬路對面可以見到公廁(男廁黎講算乾淨)同埋野飲機, 可以係呢到整理一下, 向小徑出發(右邊有涼亭上山係第二條路)

行兩三個字到, 就會見到分叉路口, 向右行落少少斜路, 就會到左條小村, 有間良友士多, 

但係出發冇耐應該唔駛補給啦....XDD, 其實係士多前少少有個碼頭仔, 影相係幾靚, 不過我第一次行冇為意, 第二次行又唔記得左

繼續行就係赤徑碼頭, 我地走會o係呢個位上艇仔返黃石

北潭凹 >  赤 徑  > 大浪坳 > 蚺蛇坳 > 蚺蛇尖 > 米粉頂 > 東灣 > 大灣 > 鹹田灣 > 大浪坳 > 赤徑 > 黃石碼頭巴士總站

一圖睇晒赤徑地理, 就係中間有個公廁, 然後有兩個CampSite, 人流都算多, 

咁緊係la, 交通方便, 有公廁, 又有水玩, 間唔時又有牛牛食草.....要去廁所好o係呢到搞掂埋啦 

如果潮退, 呢到無論你用航拍又好, 單反易紅樹林又好, 手機又好, 影相都好靚, 都可以近距離睇紅樹林, 小編o個日水清行, 航拍出黎既相意外地靚

在向前行, 佰見到右邊一條上斜, 左邊就係去香港青年旅舍協會白普理堂, 兩條路都可以繼續前進, 只係白普理堂係行樓梯, 右邊係斜路

北潭凹 > 赤徑 > 大 浪 坳 > 蚺蛇坳 > 蚺蛇尖 > 米粉頂 > 東灣 > 大灣 > 鹹田灣 > 大浪坳 > 赤徑 > 黃石碼頭巴士總站

行過一段上斜路段, 就會黎到呢個分叉路口: 大浪拗, 可以小休一會就出發

向左邊上山, 只係正式開始, 因為8,9成路段都係冇頂遮頭。 而呢個位前面方向, 係我地回程鹹田灣返黎既方向。

正式開始登頂, 會開始係冇頂遮頭既路, 朋友仔做好防曬, 沿途右邊都係大浪灣, 可以見到大家既回程路線

北潭凹 > 赤徑 > 大浪坳 >  蚺 蛇 坳 > 蚺蛇尖 > 米粉頂 > 東灣 > 大灣 > 鹹田灣 > 大浪坳 > 赤徑 > 黃石碼頭巴士總站

一直行, 去到一個開揚d 既位, 就係 蚺 蛇 坳, 路牌左邊係去高流灣方向, 右邊就係繼續上山, 

人多人少呢個位已經可以再睇清楚D, 人多既時候會見到山路點紅點綠XX

見到離目標又近一步, 緊係打張咭先

開始大概分開3段呢D 碎石路, 越上會越"直", 有需要既呢段開始可以帶手套半爬咁上去, 而呢段可以講係全程最難行o個段

幸好佢係碎石之餘都有大石可以踩腳

上完第一段, 可以小休一下, 打個咭, 又離個頂近一段la !!

之後去到有個空曠d 既位, 明顯叉開左幾條路, 而大家可以跟住圖咁去揀路線, 除非你想中段走, 又唔想行回頭路, 

可以考慮呢到向東灣行, 咁樣可以行少一半路程

去到最後一段啦!!!! 就係咁樣半碎石, 半踩大石咁上去, 都開始見到頂架啦, 應該會開始聽到d 航拍聲...XDD

北潭凹 > 赤徑 > 大浪坳 >  蚺蛇坳 >   蚺 蛇 尖  > 米粉頂 > 東灣 > 大灣 > 鹹田灣 > 大浪坳 > 赤徑 > 黃石碼頭巴士總站

登頂啦登頂啦 !!!! 先俾大家睇下呢個蚺蛇尖既遠貌

右邊係小編出發既上山路線, 可以見到白色就係d 碎石路, 上到頂其實已經有個打咭位, 但多數人上到頂都只會直沖去中間先抖, 

所以好多人都會miss 左呢個位, 而我都唔例外...XDD, 而標高處打咭是常識吧, 之後離另一邊落山既位都有個打咭位, 

大家都會排隊影, 唔駛心急....安全至上...當然上到頂大家都可以大抖一下, 就準備一段長長既落山回程路

標高柱, 你鐘意企又得坐得, 圍住佢影又得

打咭位C, 其實冇想像中咁危險......你係要唔小心, 平路都可以PK既道理咁Lor 

北潭凹 > 赤徑 > 大浪坳 >  蚺蛇坳 >  蚺蛇尖>  米 粉 頂  > 東灣 > 大灣 > 鹹田灣 > 大浪坳 > 赤徑 > 黃石碼頭巴士總站

因為登完頂已經冇乜心機影相, 所以冇近距離咁去影米粉頂, 

一眼睇晒係山頂沿路落斜, 一開頭落都係碎石路, 小心D 用埋手套慢慢落就OK 

之後都係較平緩既山路, 難道不高, 而去到米粉頂前都有個差不多既山峰, 

所以上到山峰可以望到米粉頂有兩條路, 一條就係上米粉頂既路 (A), 一條就係挨山邊行, 唔駛上既B路, 兩條都係會去返同一條路

仲有力既, 可以上埋呢個米粉頂, 但其實唔會話太特別, 還掂你打咭都唔會用米粉頂去打咭, 所以上唔上都真係冇乜所謂

但反而路線B 係較斜既山路, 要慢慢咁扶住去, 鐘意刺激既可以行呢條路

不斷既碎石路落斜, 如果大家對鞋唔夠咬地, 會相對有少少難落, 不過大不了坐住慢慢落就問題不大,

行左三份二, 有舊大石, 好似天然既打咭石咁, 可以影張相先走

落左大半個鐘, Around 3/4 既路程, 會有條小小溪, 有條小水喉可以洗個面抹一抹身

你係野人既....其實可以好似朋友仔咁......直接沖身........佢理論係, 行海邊好快吹返乾.......雖然事實又真係咁, 不過最緊要唔好吹病....

北潭凹 > 赤徑 > 大浪坳 >  蚺蛇坳 >  蚺蛇尖> 米粉頂 >   東 灣  > 大灣 > 鹹田灣 > 大浪坳 > 赤徑 > 黃石碼頭巴士總站

可能落到呢個位, 大家d 體力都用左六七八成咁樣......所以鐘意都可以係呢到抖一抖, 

呢個灣係算係一個CampSite, 間唔時都有牛牛係到食草, 

出返去有兩條路, 一條叢林繼續上返去大灣, 一條係出沙灘行, 

我兩次都係行沙灘, 行海邊過幾舊大石, 

黎到呢個峽谷位, 好似得個山崖上咁, 其實只係幾級大石, 半爬上去就可以繼續行程

爬左上黎, 行一小段山路, 未算爆林, 三四個字已經可以去到下一個目的地, 大灣

北潭凹 > 赤徑 > 大浪坳 >  蚺蛇坳 >  蚺蛇尖> 米粉頂 > 東灣 >   大 灣  > 鹹田灣 > 大浪坳 > 赤徑 > 黃石碼頭巴士總站

大灣如果有航拍, 係一個好好放既地方, 因為冇乜風 (睇風向啦) 地方大冇乜干擾, 任飛咁濟, 好爽, 

唔難見到有人係到Camp或者滑浪, 但對於我地行山人士黎講, 算叫做一個大大回氣既地方, 

因為行沙灘, 心情都會輕鬆d, 尾段架啦, 過埋個山頭就係終點鹹田灣架啦

北潭凹 > 赤徑 > 大浪坳 >  蚺蛇坳 >  蚺蛇尖> 米粉頂 > 東灣 > 大灣 >  鹹 田 灣  > 大浪坳 > 赤徑 > 黃石碼頭巴士總站

穿過最後一段叢林, 去到尾, 終於聽到D 炒野聲, 聞到D 野食味

終於到尾站 鹹田灣, 一落見到幾間士多, 可以醫肚、去廁所、有淡水洗下面, 買野飲

去兩次我都只係望到啤酒 $20 罐 $25枝.....其他野食同野飲完全冇望過....

而如果唔急住大抖, 可以行返麥理浩徑返轉頭, 仲有間興記士多, 聞說有豆腐花食

而鹹田灣除左有士多, 仲有條木橋仔, 都多人係到打咭

其實呢條河仔上游就係雙鹿石澗, 有機會都想去玩下, 係橋玩左一餐, 大抖完, 就正式回程lu ~ 

北潭凹 > 赤徑 > 大浪坳 >  蚺蛇坳 >  蚺蛇尖> 米粉頂 > 東灣 > 大灣 > 鹹田灣 >大浪坳 >  赤 徑  > 黃石碼頭巴士總站

一條石屎路, 緩斜, 可能對行左成日既朋友仔黎講會有d 吃力, 但捱埋返大浪拗就全部落斜, 

可以沖落山返赤徑走架La !!!!

當大家返到赤徑, 時間正常都應該5點咁上下, 會有艇家係咁問你地係咪返黃石, 

之前都提過大家有本事可以用多個半鐘既時間行埋去黃石, 

但強烈建議唔好原路返北潭凹 坐巴士, 因為八九成機會巴士唔係FullHouse飛站就係企位, 因為除左行山人外, 仲有一堆去完camp既朋友仔走

行左成日應該都唔想企返西貢吧, 倒不如俾$20, 係赤徑返黃石碼頭

後記: 

冇旅行去, 第一次打行山Blog, 唔知咁既形式係符唔符合呢件事

唔係想做大師, 只係想將一d去過唔錯既地方同大家分享, 同一件人事物地方照片, 唔同既人會有唔同既觀感角度, 唔知我眼中既蚺蛇尖同你眼中既又會唔會有唔同呢?

到最後, 幫蚺蛇尖 打返星星先, 但始於小編香港行既山唔太多, 好難用其他山作比較, 所以星星都可能打得較主觀

難度: (攻頂前後碎石路較多, 可用手套配合)

景觀: (主要都係登頂後望到既景觀360度夠開揚, 藍天大海山景襯都絕)

郊遊指數: (唔上頂, 都適合一家大細行, 但上頂始於有危險路段, 就唔係咁岩一家大細了)

糧食包配備: 視乎天氣, 好天既基本2L水, 但陰天我只係飲左1L 水, 始於鹹田灣可以補給下 + 生果 / EnergyBar 走唔甩

更多旅遊網誌: http://sliver2travel.pixnet.net/blog
花花臉書專頁: https://www.facebook.com/silver2travel/
更多美照: https://www.instagram.com/silver2travel/